Pinangalanan ni Pangulong Ferdinand “Bongbong” Marcos Jr. ang 15 pangunahing kontraktor na nakakuha ng pinakamalaking bahagi ng mga flood control projects sa buong bansa nitong nakaraang tatlong taon.

Ayon sa ulat ng Department of Public Works and Highways (DPWH), mula Hulyo 2022 ay umabot na sa ₱545 bilyon ang inilaan ng pamahalaan para sa mga proyektong pangkontrol sa baha. Sa halagang ito, tinatayang 20% o ₱100 bilyon ang napunta lamang sa 15 kontraktor.

Narito ang Top 15 Contractors:

1. Legacy Construction Corporation

2. Alpha & Omega General Contractor & Development Corp.

3. St. Timothy Construction Corporation

4. QM Builders

5. EGB Construction Corporation

6. Topnotch Catalyst Builders Inc.

7. Centerways Construction and Development Inc.

8. Sunwest, Inc.

9. Hi-Tone Construction & Development Corp.

10. Triple 8 Construction & Supply, Inc.

11. Royal Crown Monarch Construction & Supplies Corp.

12. Wawao Builders

13. MG Samidan Construction

14. L.R. Tiqui Builders, Inc.

15. Road Edge Trading & Development Services

Sa isang press conference sa Malacañang, binigyang-diin ni Marcos na nakakabahala ang datos na lima sa mga kumpanyang ito ay may hawak ng mga proyekto halos sa buong bansa.

“That for me was the one that stood out very much… kailangan natin tingnan,” ani ng Pangulo.

Dagdag pa ni Marcos, layunin ng isinasagawang audit na alamin kung bakit sa iilang kontraktor lamang napunta ang malaking bahagi ng pondo, at kung may iregularidad na naganap.

Hindi naman muna idinidikit sa katiwalian ang naturang sitwasyon, subalit iginiit ng Pangulo na dapat magsilbi itong babala. Hinikayat din niya ang publiko na magbigay ng impormasyon at komento hinggil sa implementasyon ng flood control projects sa kanilang lugar.

Matatandaang sa kanyang ika-apat na State of the Nation Address (SONA) noong Hulyo 28, ipinag-utos ni Marcos ang masusing pag-audit sa mga flood control projects dahil sa patuloy na pagdurusa ng taumbayan sa mabilis na pagbaha tuwing malakas ang ulan. (Latigo Reportorial Team)