Hindi lamang pagkain kundi pati pag-asa ang dala ni Senadora Imee Marcos sa kanyang pagbisita sa Correctional Institution for Women (CIW) bilang bahagi ng pagdiriwang ng National Women’s Month.
Buong tapang na nagbigay ng mensahe si Senadora Marcos sa mga nakapiit na kababaihan, hinihimok silang huwag mawalan ng pag-asa at patuloy na magsikap para sa mas magandang kinabukasan. “May pag-asa pa kahit nasa likod ng rehas!” ani Marcos, na nagsilbing inspirasyon sa mga preso.
Maliban sa kanyang mensahe, nagbigay rin ang senadora ng pagkain, twalya, at tsinelas bilang bahagi ng kanyang suporta sa mga kababaihang nasa piitan. Ipinakita rin niya na hindi sila nag-iisa sa kanilang laban sa buhay.
Sa kanyang talumpati, binigyang-diin ni Marcos ang kahalagahan ng pangalawang pagkakataon para sa mga nasa correctional facility. Ayon sa kanya, mahalaga ang pagkakaroon ng programa na makakatulong sa muling pagbabalik ng mga bilanggo sa lipunan nang may dignidad at bagong pag-asa.
Samantala, pinasalamatan ng mga opisyal ng CIW at mga preso ang senadora sa kanyang walang sawang pagtulong at pagbibigay ng inspirasyon. Ayon sa ilang inmates, malaking bagay para sa kanila ang maramdamang may nakakaalala sa kanila sa kabila ng kanilang sitwasyon.
Patuloy ang kampanya ni Senadora Marcos sa pagsusulong ng mga batas at programa na magpapalakas sa karapatan at kapakanan ng mga kababaihan, lalo na ang mga nasa mahihirap na kalagayan.
Patunay ang pagbisitang ito na walang hadlang—kahit rehas—sa muling pagbangon ng isang babaeng may pangarap at determinasyon. (Latigo Reportorial Team)