Muling nabuhay ang usapin ng seguridad sa Pilipinas matapos maglabas ng travel advisory ang gobyerno ng Australia kamakailan. Ayon sa nasabing babala, kinakailangang mag-ingat ang mga mamamayan nito na bibisita sa ating bansa dahil sa banta ng terorismo at karahasan. Partikular na tinukoy ang Mindanao — kabilang ang Zamboanga Peninsula, Sulu Archipelago, at southern Sulu Sea — bilang mga lugar na may mataas na panganib ng terorismo at kidnapping.
Bagama’t hindi na bago ang ganitong mga abiso mula sa ibang bansa, nakapanghihinayang pa rin na patuloy na nadudungisan ang imahe ng Pilipinas sa larangan ng turismo. Ang mga lugar tulad ng paliparan, pampublikong transportasyon, hotel, shopping mall, restaurant, major events, at maging ang mga simbahan ay binanggit na posibleng target ng mga teroristang pag-atake. Dahil dito, hindi maiiwasang mangamba ang mga dayuhang turista at maging ang mga lokal na mamamayan.
Ngunit sa kabila ng pangambang dulot nito, mahalagang balikan ang katotohanan. Hindi maikakaila na may mga lugar sa bansa na talagang may mataas na banta sa seguridad, ngunit hindi rin dapat mawalan ng pag-asa ang sambayanang Pilipino sa patuloy na pagsisikap ng ating gobyerno na mapanatili ang kapayapaan at kaayusan. Patuloy ang pagpapatupad ng mga programa at hakbang upang masugpo ang terorismo at krimen, lalo na sa mga lugar na tinukoy sa advisory.
Gayunpaman, may pananagutan din ang pamahalaan na ipakita sa buong mundo na ang Pilipinas ay ligtas at ­maasahan bilang destinasyon ng turismo. Kailangang palakasin ang pagpapatrolya, magpatupad ng mas pinaigting na seguridad, at makipagtulungan sa mga komunidad upang maiwasan ang mga banta ng karahasan.
Mahalaga ring palakasin ang pagpapakalat ng impormasyon upang maliwanagan ang publiko sa mga hakbang na ginagawa para sa kanilang kaligtasan.
Sa huli, hindi lamang ang gobyerno ang may papel sa pagpapanatili ng kaligtasan. Ang bawat mamamayan ay dapat makiisa sa pagbabantay sa kanilang kapaligiran at agad na magsumbong sa mga awtoridad kung may makitang kahina-hinalang kilos o pangyayari. Ang pagkakaisa at kooperasyon ng lahat ay susi sa pagpapanatili ng kapayapaan sa ating bayan.
Sa kabila ng mga hamon, nananatiling matatag ang Pilipinas — isang bansa na patuloy na bumabangon at nagsusumikap na makamit ang tunay na kapayapaan at kaligtasan para sa lahat.
(Grace Batuigas)