PCOL Dalmacia at PCOL Malinao, deadma pa rin!
CALABARZON — Sa kabila ng patuloy na panawagan ng mga mamamayan at kaliwa’t kanang ulat ng media, tila lalong lumalala ang operasyon ng mga iligal na sugal sa mga lalawigan ng Laguna at Batangas.
Kasunod ng naunang ulat tungkol sa umano’y pananahimik ng mga hepe ng kapulisan sa nasabing rehiyon, muling umalingawngaw ang mga bagong ebidensyang nag-uugnay kina PCOL Ricardo Dalmacia ng Laguna at PCOL Jacinto Malinao ng Batangas sa umano’y “tara system” o lingguhang lagayan mula sa mga operator ng sugal.
Ayon sa isang dating pulis na tumangging magpakilala, sistematikong ipinapasa mula barangay, istasyon ng pulis, hanggang sa mga tanggapan ng provincial director ang koleksiyon mula sa mga sugalan. “Hindi ito basta-basta. May organisado silang galawan. May tagakuha, may tagapasa, at may tagatanggap. Kaya kahit ulanin ng reklamo, hindi umuusad—dahil protektado ang lahat ng nasa itaas.”
Sa Lungsod ng San Pedro, Cabuyao, at Biñan, naging bukambibig na ng mga residente ang mga peryahan na ginagawang sentro ng sugal. Ayon sa isang barangay tanod na muling nagsalita sa kondisyon ng anonymity, may mga pagkakataong mismong mga pulis pa ang nagbibigay ng seguridad sa mga lugar ng sugal. “May patrol car pang naka-park, parang nagbabantay pa. Nakakapanlumo.”
Sa Batangas, tila naging bahagi na ng gabi ang mga pa-ilaw at tugtugan ng mga peryahang ginagawang sugalan. Ayon sa isang ina mula San Juan, “Ginagawang perya ang buong komunidad. Pumupunta ang mga bata, nanonood, hanggang sa sila na rin ang natututo tumaya. Napakasakit sa magulang.”
Hindi rin ligtas sa batikos ang ilang lokal na opisyal. Isang sumbong ang nagsabing may mga barangay chairman na nakikinabang din umano sa operasyon. “Kapag malakas ang kita ng sugalan, may ambon din sa opisina,” ayon sa isang source mula Lipa.
Sa gitna ng galit at pagkadismaya, lalong lumalakas ang panawagan para sa agarang aksyon ng pambansang pamunuan. Muling nanawagan ang mga grupo ng mamamayan sa PNP at DILG na magsagawa ng lifestyle check sa mga opisyal ng pulisya sa Laguna at Batangas.
“Wala nang silbi ang mga hepe kung hindi nila kayang panindigan ang batas. Kung hindi sila parte ng solusyon, baka sila na mismo ang ugat ng problema,” ani ng isang lider ng faith-based organization mula Calamba.
Patuloy na inaabangan ng taumbayan ang magiging tugon nina PCOL Dalmacia at PCOL Malinao. Hanggang kailan mananatiling tikom ang kanilang bibig? At higit sa lahat—hanggang kailan magbubulag-bulagan ang mga dapat sana’y tagapagtanggol ng batas? (Latigo Reportorial Team)
