Personal na kinamusta ang kalagayan ng mga naapektuhan ng baha
PASIG CITY — Personal na dinalaw ni Senador Rodante Marcoleta kasama ang kanyang anak na si SAGIP Party-list Representative Paolo Henry Marcoleta ang mga evacuees na pansamantalang nanunuluyan sa Westbank ng Manggahan Floodway sa Barangay Maybunga, Pasig City.
Layunin ng pagbisita ng mag-amang Marcoleta na alamin ang kalagayan ng mga residente na naapektuhan ng matinding pag-ulan at pagbaha sa lugar. Ayon sa lokal na pamahalaan, aabot sa mahigit 400 pamilya ang napilitang lumikas mula sa kanilang mga tahanan at kasalukuyang nakatira sa mga evacuation centers gaya ng Westbank Community Center at Maybunga Elementary School.
Bilang bahagi ng kanilang humanitarian outreach, nagsagawa rin ang grupo nina Senador Marcoleta ng pamamahagi ng rice packs sa mga evacuees. Ang nasabing tulong ay bahagi ng patuloy na pag-abot ng serbisyo sa mga komunidad na nangangailangan, lalo na sa panahon ng sakuna at kalamidad.
Kasama rin sa aktibidad si Congressman Roman Romulo, na dumalo upang ipakita ang suporta sa mga naapektuhan. Dumating din ang mga opisyal ng barangay, ilang mga Konsehal ng Bayan, at mga kawani mula sa City Social Welfare Office ng Pasig upang tiyakin na maayos na naipapatupad ang disaster response at distribusyon ng ayuda.
Ang pagtutulungan ng mga lokal at pambansang opisyal ay naging mahalagang hakbang upang mapagaan ang nararanasang hirap ng mga apektadong pamilya. Sa gitna ng patuloy na pagbabago ng panahon at banta ng pagbaha, iginiit ng mga kinauukulan ang kahalagahan ng koordinasyon at mabilis na aksyon para matiyak ang kaligtasan at kapakanan ng bawat mamamayan.
Patuloy ang monitoring ng mga ahensya ng gobyerno sa sitwasyon sa lugar habang inaasikaso rin ang posibilidad ng relokasyon at mas pangmatagalang solusyon sa mga naninirahan sa mga lugar na mataas ang panganib tuwing may masamang panahon. (Latigo Reportorial Team)
