BATANGAS – Habang lumalalim ang usapin hinggil sa talamak na operasyon ng mga iligal na pasugalan at “paihi” sa lalawigan, nagpahayag ang ilang civic groups at residente ng intensiyon na dalhin ang kanilang hinaing sa pambansang tanggapan ng PNP kung mananatiling walang malinaw na aksiyon mula sa provincial command.

Sa kabila ng mga naunang ulat tungkol sa malawakang saklaan, bookies, pergalan at operasyon ng e-sabong sa Cuenca, Alitagtag, San Luis, Lian at maging sa ilang pamilihan na malapit sa municipal hall, patuloy ang pangamba ng publiko na humihina ang pagpapatupad ng batas sa mga naturang lugar.

Nagpapatuloy rin ang usapan hinggil sa umano’y pagkakadawit ng ilang pangalan sa mga nag-oorganisa ng pasugalan, kabilang sina Larry “Bokbok,” Jayson “Tomboy,” Donya Yolly at ang tinaguriang “Big 4” ng saklaan at bookies. Hindi rin humihinto ang mga balita sa patuloy na operasyon ng e-sabong na konektado kina Aries Alvarez at alyas John Capinpin.

Ayon sa mga ulat, pinaghahandaan na ng mga residente at civic groups ang paghahain ng pormal na reklamo sa National Police Commission at sa tanggapan mismo ng PNP Chief upang matiyak na may masusing imbestigasyong isasagawa. Bahagi rin ng kanilang plano ang pagsasagawa ng serye ng community consultations upang maitala ang lawak ng umano’y pinsala ng mga iligal na gawain sa kabuhayan at seguridad ng mga mamamayan.

Sa gitna ng lumalawak na diskusyon, inaasahan ng publiko ang pahayag ng kasalukuyang Provincial Director hinggil sa mga alegasyon at kung anong mga hakbang ang ipatutupad upang sugpuin ang mga binanggit na operasyon. Mananatiling nakatutok ang mga grupo at ang pahayagang ito sa mga susunod na kaganapan habang patuloy na umaasa na masusupil ang mga iligal na aktibidad sa lalawigan. (Latigo Reportorial Team)