CAMP OLIVAS, Pampanga — Isang malaking tagumpay ang naitala ng Police Regional Office 3 (PRO-3) matapos maaresto ang lahat ng 10 Regional Level Most Wanted Persons (RLMWPs) sa Gitnang Luzon sa loob lamang ng 14 araw.

Mula Oktubre 1 hanggang 14, isinagawa ng mga pulis ang serye ng mga planadong manhunt operations sa pitong lalawigan ng rehiyon, na nagresulta sa pagkakadakip ng mga indibidwal na may kasong pagpatay, panggagahasa, pagnanakaw, at paglabag sa batas laban sa ipinagbabawal na gamot.

Kabilang sa mga nadakip ang apat na itinuturing na pinakamapanganib sa listahan ng mga pinaghahanap — sina Rolando Estanislao, na may kasong murder at frustrated murder; Ernie Juat, na may dalawang bilang ng rape; Christian Adrales, na may kasong murder; at Harren Josh Santos, na may mga kasong robbery, carnapping, at illegal possession of firearms.

Pinangunahan ng Bulacan Police ang operasyon na nagresulta sa pagkakaaresto ng tatlo sa mga pangunahing most wanted sa pamamagitan ng pinagsamang paggamit ng masusing intelligence, estratehikong pagpaplano, at koordinasyon sa iba’t ibang yunit ng pulisya sa rehiyon.

Ayon sa ulat ng PRO-3, ang pagkakaaresto sa lahat ng most wanted ay patunay ng patuloy na pagpapatupad ng batas at ng determinasyon ng kapulisan na sugpuin ang kriminalidad sa Gitnang Luzon. Binigyang-diin din ng pamunuan na patuloy nilang palalakasin ang intelligence sharing at koordinasyon sa bawat yunit upang mas mapabilis ang pagtugis sa mga natitirang kriminal.

Dagdag pa rito, tiniyak ng PRO-3 na magpapatuloy ang ganitong antas ng operasyon upang mapanatili ang katahimikan, kaayusan, at seguridad ng mga mamamayan sa buong rehiyon.(Latigo Reportorial Team)