Ano’ng Ibig Sabihin Nito sa Ating Karaniwang Mamamayan?
Kumusta mga Parekoy?
Napansin n’yo ba ang balitang nag-rally ang Philippine Stock Market matapos ang katatapos lang na 2025 midterm elections? Aba, mukhang may good vibes tayong nakuha mula sa resulta ng halalan at sa international scene, lalo na sa usapin ng US-China trade tensions.
Pero teka—ano bang ibig sabihin nito? At bakit tayo dapat makialam?
Ganito kasi ’yan. Ayon sa Philippine Stock Exchange, tumaas ang PSE index ng 1.68% o 108.62 points—umabot ito sa 6,566.82. Ang All Shares index naman ay tumaas din ng 1.13% o 42.48 points, at nagtapos sa 3,805.33. Sa madaling salita, mukhang masaya ang mga investors. Bakit kaya?
Sabi nga ni Michael Ricafort ng RCBC, nakatulong daw ang maayos at mapayapang eleksyon. May mga “positive surprises” din sa resulta, lalo na sa Senado, na tila nagbigay ng tiwala sa merkado na magiging maayos ang takbo ng gobyerno sa mga susunod na taon.
Idagdag pa riyan ang easing o pagluluwag ng trade tensions sa pagitan ng US at China—eh di mas lalong nabuhayan ang mga negosyante at investors!
Pero siyempre, alam kong ang tanong ng marami ay: “Eh ano naman ngayon kung tumaas ang stock market?” Simple lang—kapag ang market ay malusog at mataas ang kumpiyansa, mas nagiging bukas ang mga kumpanya sa pag-expand, mag-hire ng tao, at mag-invest sa mga bagong proyekto. Sa kalaunan, ramdam natin ’yan sa trabaho, kita, at pamumuhay.
Ang magandang balita pa, ayon pa rin kay Ricafort, ay naabot ng PSEi ang pinakamataas na antas nito sa loob ng apat na buwan—mula pa noong Enero 6. At eto pa, nabawi na raw nito ang lahat ng pagkalugi simula nang manungkulan si US President Donald Trump nitong Enero 20. Malaking bagay ’to, kasi nakikita nating lumalakas muli ang loob ng mga investors kahit pa may mga global uncertainties.
Kaya mga kababayan, habang ang iba sa atin ay abala pa sa pag-aanalisa ng resulta ng halalan, ang merkado naman ay mukhang may bagong sigla. At sana, ang siglang ’yan ay dumaloy rin sa bawat aspeto ng ating kabuhayan.
Hanggang sa susunod nating kwentuhan sa kolum na ito, mga parekoy. Tandaan: kahit mukhang malayo sa atin ang stock market, konektado pa rin tayo rito—dahil ang ekonomiyang malusog ay ekonomiyang may pag-asa para sa lahat.
Hanggang sa muli, parekoy! (DJ Gealone)
