LUNGSOD NG MALOLOS — Muling pinatunayan ng Lalawigan ng Bulacan ang galing at husay sa larangan ng agrikultura at ­pangisdaan matapos itong tumanggap ng maraming parangal sa katatapos na Ika-50 Gawad Saka awarding ceremony na ginanap sa Travelers Hotel, Subic, Zambales noong nakaraang linggo.
Personal na tinanggap nina Ma. Gloria SF. Carrillo, Pinuno ng Provincial Agriculture Office, at Dr. Voltaire G. Basinang, Pinuno ng Provincial ­Veterinary Office, ang Outstanding Provincial Local Government Unit award para sa ­Pamahalaang Panlalawigan ng Bulacan. Kalakip nito ang plake ng pagkilala at seremonyal na tseke na nagkakahalaga ng P50,000.
Sa kaniyang mensahe, binati ni Department of Agriculture Undersecretary for Operations and Agri Fisheries Mechanization Roger V. Navarro ang mga pinarangalan at kinilala ang mahalagang papel ng mga magsasaka at mangingisda sa pag-unlad ng bansa.
“While the Department of Agriculture ­encourages partnership in nation building and food security, we know fully well that national progress begins with ­individual achievements, and these we celebrate today.
Individual achievement is the cornerstone in which innovation, hard work, and dedication are purged into the national economy.
It is the spark that ignites progress on the national scale, converting personal ­dedication into a collective march towards shared goals” aniya.
Bukod sa pamahalaang panlalawigan, ilang Bulakenyo rin ang tumanggap ng parangal tulad nina ­Aquino Jr. mula sa Doña Remedios Trinidad bilang Outstanding High-Value Crop Farmer – ­Plantation Crops; Bausa Integrated Farm and Training Center Inc. mula sa San Ildefonso bilang Outstanding Urban and Peri-Urban Agriculture Garden (Macrogarden); Luzon Dairy Cooperative mula sa Santa Maria bilang ­Outstanding Dairy ­Cattle Raiser; Danilo Dionisio mula sa Paombong bilang Outstanding Fisherfolk ­ (Aquaculture); at ang City ­Fisheries and Aquatic Resources ­Management ­Council of Malolos bilang ­Outstanding City/Municipal Fisheries and Aquatic Resources ­Management Council.
Isang malaking karangalan para sa Bulacan ang pagkilalang ito na patunay ng sipag, talino, at dedikasyon ng mga mamamayan nito sa larangan ng ­agrikultura at ­pangisdaan.(Latigo Reportorial Team)